صوت الميدان

سمعت صوت الميدان قلبي اتنفض
المصري أهو يا ولاد واقف زي الأسد

صوت الميدان مسموع و طالع في العالي
مليان شجن و دموع على شهيد غالي

و الله عليكي يا بلد جامدة و قويه
شبابك ضحوا عشان كرامة و حرية

لمسوا قلب المصري إلي ماشي جنب الحيط
صوته اتنبح في قول  اتمرمت و اتهديت

بيكو رجعله صوته و كرامته من تاني
ده الحرية غالية يا ولاد ماترجعش في ثواني

شباب عرف الصمود و الحب و الإصرار
عزيمته و قوته هيخلقوا  استقرار

 صوتكم يا أغلى  شباب خبط على كل باب
عدى بحور و تلال و غزى كل البلاد 

شباب مضطهد مغمور وصل حلمه للنور
رفض ظلم النظام و أتحرر زي العصفور

صوتنا هيشرف ولدنا و يرجع تاني امجادنا
رجعنا حريتنا و شرفنا أجدادنا

و لسة سامع صوت الميدان  بييجلجل من تاني
و الله عليك يا ميدان يا ماسح أحزاني

على اسم مصر

على اسم مصر التاريخ يقدر يقول ما شاء


أنا مصر عندي أحب وأجمل الأشياء


باحبها وهي مالكه الأرض شرق وغرب


وباحبها وهي مرميه جريحة حرب


باحبها بعنف وبرقة وعلى استحياء


واكرهها وألعن أبوها بعشق زي الداء


واسيبها واطفش في درب وتبقى هي ف درب


وتلتفت تلقيني جنبها في الكرب


والنبض ينفض عروقي بألف نغمة وضرب


على اسم مصر


النسيم في الليالي وبياعين الفل


ومرايه بهتانة ع القهوة .. أزورها .. واطل


القى النديم طل من مطرح منا طليت


والقاها برواز معلق عندنا في البيت


فيه القمر مصطفى كامل حبيب الكل


المصري باشا بشواربه اللي ما عرفوا الذل


ومصر فوق في الفراندة واسمها جولييت


ولما جيت بعد روميو بربع قرن بكيت


ومسحت دموعي في كمي ومن ساعتها وعيت


*****


مصر السما الفزدقي وعصافير معدية


والقلة مملية ع الشباك .. مندية


والجد قاعد مربع يقرا في الجرنال


الكاتب المصري ذاته مندمج في مقال


ومصر قدامه اكتر كلمة مقرية


قريتها من قبل ما اكتب اسمي بإيديا


ورسمتها في الخيال على أبدع الأشكال


ونزلت أيام صبايا طفت كل مجال


زي المنادي وفؤادي يرتجف بجلال


********


مصر .. التلات أحرف الساكنة اللي شاحنة ضجيج


زوم الهوا وطقش موج البحر لما يهيج


وعجيج حوافر خيول بتجر زغروطة


حزمة نغم صعب داخلة مسامعي مقروطة


في مسامي مضغوطه مع دمي لها تعاريج


ترع وقنوات سقت من جسمي كل نسيج


وجميع خيوط النسيج على نبرة مربوطة


اسمعها مهموسة والا اسمعها مشخوطه


شبكة رادار قلبي جوه ضلوعي مضبوطة


على اسم مصر

كنتوا فين لما هرب الأمان من البيوت، كنتوا فين لما بابك يا بلدي عشش عليه العنكبوت.

 كنتوا فين لما هرب الأمان من البيوت،
كنتوا فين لما بابك يا بلدي عشش عليه العنكبوت.

كنتو فين لما الخوف ملا الشوارع،
كنت فين يا دفعة ؟ كنت في مشوار و راجع

و هروبك يا مؤمن يا ترى كان بإيدك
ولا حفظ على النظام ، و طاعة لتعليمات سيدك

طلعت ضعيف و جبان
عايزنا نصدق إن سيدك  في أيده الأمان

لكن لا يا بلد شبابك رجالة
مش هانخاليي مكان للرعاع ولحوثالاه

و أه يا بلد معلهش سيد غير الله
و سيدك يا مؤمن عن طريقه تاه

لكن طول ما فينا روح المقومة و طول ما نورك يا بلدي طالع
نراك يا ظالم هتفضل أيدا و هانبعد عنا  المواجع

و هنصقت النظام و هنرجع الأمان
و طول يا بلدي مانتي خايفة شعبك عمره ما هاينام

بهيه

شفت رمشك يا بهية قلت أه 
لمحت خصرك علميه قلت الله
لا ألف نظرة من ميت صبية راح تشفي عليلي
ده كفية بس أشوف الضحكه   وإنتي بيتمييلي


و أه و أه على ده زمن ،مالى قلوبنا بي أشد ألم
ألم الخسارة القوية ، خسرتك يا أحلى صبية


يامو العيون السود، يالي رحتك مسك و عود
ارتوىت أنا من ضحكتك، و دبحتي قلبي من غربتك


يا خسرتك يا احلي صبية!


يا شافيف تستاهل ميت اه و اه
يا اخدود احلي من القمر في سماه


و ارجع و اقول يا خسرتك يا بهيه
يالي جمالك يفتن احلي صبيه